अत्यल्प वेतनात संसार चालवायचा कसा?

धाराशिव - प्राथमिक आरोग्य केंद्रात व उपकेंद्रात १९९६ पासून आम्ही सेवा देत आहोत, साहेब केारोना काळात आम्ही आमच्या मुलांच्या, कुटुंबासह स्वत:चा जीव धोक्यात घालून सेवा दिली. आज १९९६ पासून आम्ही लढा देत आहोत तरी आज आम्हाला केवळ ३ हजार रुपये मानधन मिळत आहे. यात आम्ही जगायचे कसे, कुटुंब चालवायचे कसे, असे बोलताना धाराशिव जिल्हा परिषदेच्या इमारतीसमोर प्राथमिक आरोग्य केंद्रातील, उपकेंद्रातील अंशकालीन स्री परिचर महिला कर्मचाऱ्यांना सांगताना अश्रू अनावर झाले होते. याबाबतचे निवेदन महासंघाच्या धाराशिव जिल्हा अध्यक्षा अनिता क्षीरसागर यांच्यासह अन्य महिला पदाधिकाऱ्यांनी एकत्र येत मुख्य कार्यकारी अधिकारी मैनाक घोष यांना दिले आहे.

यावेळी महासंघाच्या कोषाध्यक्ष रेणुका आव्हाड, सरचिटणीस सुनिता शिरसागर, कार्याध्यक्ष कांताबाई खांडेकर, तालुकाध्यक्ष रंजना धोंगडे उपस्थित होत्या.

किमान २१ हजार रुपये वेतन दरमहा त्वरित लागू करावे अन्यथा १ जुलैपासून मुंबईतील आझाद मैदानावर बेमुदत धरणे आंदोलन करण्याचा इशाराही परिचरांनी दिला आहे.

स्त्री परिचर महिलांच्या या आहेत प्रमुख मागण्या आरोग्य उपकेंद्रात व प्राथमिक आरोग्य केंद्रात कार्यरत अंशकालीन स्री परिचर महिलांना किमान २१ हजार रुपये वेतन दरमहा त्वरित लागू करावे, अंशकालीन नावात बदल करावा, दरवर्षी गणवेश मिळावा, दरवर्षी भाऊबीज निमित्त २ हजार रुपये मिळाले पाहिजेत, दरवर्षी अपघात विमा योजना लागू करावा, मानधन थकीत न ठेवता दर महिन्याच्या १ तारखेला मानधन अदा करावे अशा विविध मागण्या यावेळी निवेदनातून करण्यात आल्या आहेत.